Тошкентлик эркак алимент тўламагани учун икки марта жазоланди, деб ёзади “Ҳуқуқ” нашри.

Айтилишича, Карим Абдуллаев бир неча йиллар муқаддам ажрашиб кетган, унинг собиқ рафиқаси Шарофат қўлида икки бола билан қолиб кетган. Уларни боқишга қийналган аёл судга мурожаат қилган.

Суд буйруғига кўра, отага 2 нафар вояга етмаган боланинг таъминоти учун ҳар ойлик даромадининг учдан бир қисми миқдорида алимент ундириш белгиланган. Аммо ижро ҳужжати билан танишиб, ундаги талабни бажармаган Абдуллаев бир неча огоҳлантиришдан сўнг ҳибсга олиниб, 1 йилга ахлоқ тузатиш ишлари жазосига маҳкум этилган. Кейинроқ амнистия туфайли у жазодан озод қилинган.

Аммо орадан маълум муддат ўтиб, у алимент пулини тўламагани боис яна 2 йилга ахлоқ тузатиш ишларига ҳукм қилинди.

Ҳар икки сафар ҳам эркакка нисбатан ЖКнинг 122-моддаси 2-қисми билан жиноят қўзғатилган эди.