Ўзбекистон президентининг жорий йилнинг 7 июлдаги Республика иқтисодиёти ва ижтимоий тармоқларини 2015-2016 йиллар куз-қиш даврида барқарор ишлашга тайёрлашни таъминлаш комплекс чора-тадбирлари тўғрисидаги қарори ижроси доирасида Фарғона вилоятида ҳам куз-қиш мавсумига пухта тайёргарлик кўрилмоқда.

“Ўзбеккўмир” акциядорлик жамияти Фарғона ҳудудий дистрибьюторлик маркази томонидан мониторинг ўтказилиб, ижтимоий соҳа объектлари ҳамда аҳоли эҳтиёжи ўрганилди. Куз-қиш даврида аҳоли ҳамда бюджет ташкилотларининг кўмир ва брикетга бўлган эҳтиёжини таъминлаш борасида кенг кўламли ишлар амалга оширилмоқда. Бугунги кунда вилоят миқёсида мавсум учун қарийб 200 минг тонна кўмир, 59 минг тонна кўмир брикети етказиб бериш ишлари олиб борилмоқда. 

Ўзбекистон Республикаси Вазирлар Маҳкамасининг жорий йил 2 июлдаги “Республикада кўмир брикетлари ишлаб чиқариш ва сотишни комплекс ташкил этишга доир қўшимча чора-тадбирлар тўғрисида”ги қарори ижросини таъминлаш борасида вилоятда аниқ тадбирлар белгиланган.

Марғилон шаҳрида “Муслим диёр файз” масъулияти чекланган жамияти, Данғара туманида “Бунёдкор Данғара”, Фурқат туманида “Гулсанам келажаги” каби хусусий корхоналар томонидан кўмир брикети ишлаб чиқарилаётир. Олтиариқ ва Бешариқ туманларида яқин кунларда ана шундай корхоналар иш бошлайди. Замонавий технологиялар ишлаб чиқариш қувватига қараб, соатига 3-15 тоннагача кўмир брикети тайёрлаш имкониятини яратади. Маҳаллийлаштириш дастури талабларига тўла мос келувчи бундай корхоналар яқин келажакда вилоят эҳтиёжи учун зарур кўмир брикетини юз фоиз шу ерда ишлаб чиқариш имконини беради. 

Вилоят халқ таълими бошқармаси тизимидаги таълим муассасаларига салкам 43 минг тонна, вилоят ўрта махсус, касб-ҳунар таълими бошқармаси тизимига 6 минг 100 тонна, соғлиқни сақлаш бошқармаси тасарруфидаги тиббиёт муассасаларига 10 минг тонна кўмир брикети етказиб берилади.

"Бугунги кунда 10 шохобча орқали режадаги кўмир брикетини ижтимоий соҳа объектларига тўлиқ етказиб бериш ишлари ниҳоясига етказилмоқда. Вилоятдаги ва “Ангрен” махсус индустриал зонасидаги 14 кўмир брикети ишлаб чиқарувчи корхона билан имзоланган шартномалар асосида ушбу маҳсулотлар барча шохобчаларга узлуксиз етказиб берилмоқда", дейди “Ўзбеккўмир” акциядорлик жамияти Фарғона ҳудудий дистрибьюторлик маркази раҳбари Муҳаммадризо Усмонов.