Туркия президенти Ражаб Тойиб Эрдўған бутун дунё жамоатчилигини мамлакатда ўтказилган парламент сайлови натижаларини ҳурмат билан қабул қилишга чақирди.

Рейтер нашри хабарига кўра, Эрдўған бу ҳақда Истанбулдаги масжидга киришидан олдин журналистларга берган интервьюсида айтиб ўтган.

Унинг айтишича, 1 ноябрь куни Туркияда аҳоли мамлакатда барқарорлик мустаҳкамланиши учун овоз берди.

Бироз олдинроқ, сайловчиларнинг 99,21 фоиз овози ҳисоблаб чиқилганидан кейин, Адолат ва тараққиёт ҳукмрон партияси муддатидан олдинги парламент сайловларида 49,36 фоиз овоз билан ғолиб чиққани хабар қилинганди.

Партия энди бир ўзи ҳукуматни шакллантира олади.

Ўз навбатида, Халқ республика партияси 25,44 фоиз, Миллий ҳаракат партияси 11,96 фоиз, курдпараст Халқлар демократияси партияси 10,65 фоиз овоз тўплаган.

Туркия бош вазири, Адолат ва тараққиёт партияси етакчиси Аҳмет Давутўғли парламент сайловлари натижасини «демократия ғалабаси» деб атаган.