Гавайи ороллари ҳудудида яшовчи 10 яшар Рэймонд Сэненси йиртқич акуланинг ҳужумидан қутулиб қолиб, қирғоққа чиқиб олишга муваффақ бўлган. Бу ҳақда Metro нашри хабар тарқатди.

Манбанинг ёзишича, болакай бодибординг (чанғисифат доска орқали сувдаги тўлқинларда ҳаракат қилиш — «Kun» изоҳи) билан шуғулланаётган пайтда унга акула ҳужум қилган. Шунда ўн ёшли ўспирин йиртқичнинг бурнига оёғи билан зарба берган ва ундан қочишга муваффақ бўлган. Воқеа Гавайидги Оаху оролидаги Макаха Бич соҳилида содир бўлган.

Сэненсининг сўзларига кўра, акула унинг оёғидан тишлаб олган. Шунда у таҳликага тушмасдан иккинчи оёғи билан унинг юз қисмига зарба бера бошлаган. Бурнидан зарб қабул қилиб олган акула унинг оёқларини қўйиб юборган.

Ҳужум вақтида яқин ўртада бўлган яна бир бодибордёр Майк Уорд жабрланувчининг соҳилга чиқиб олиш учун ёрдамлашган, шундан сўнг бола Рэймонд шифохонага етказилган.

Сэненси воқеа натижасида оёғидан учта чуқур жароҳат олган. Ҳозирда унинг тикланиш жараёни кетмоқда.

2015 йилдан буён Гавайи ороллари ҳудудида еттинчи марта акуланинг одамга ҳамла қилиш ҳолати қайд қилинмоқда. Ҳукумат мазкур ҳолатни сувда дам олувчиларнинг кўпайиши акулаларнинг кўпайишига сабаб бўлаётгани билан изоҳлаган.

ISAF (International Shark Attack File) ташкилотининг маълум қилишича, агар акула ҳужум қилганида унинг бурни, кўзи ёки жабрасига зарба берилса, балиқ бир неча дақиқа ўзининг мўлжалидан адашиб ҳужумни тўхтатади. Шу вазиятдан фойдаланиб жабрланувчи сувдан чиқиб олиши талаб этилади.