Буюк Британия пойтахти Лондон шаҳридаги аэропортларда рекорд даражадаги туман тушиши туфайли бир неча юзлаб рейслар бекор қилинди. Бу ҳақда The Independent нашри хабар берди.

Маълум қилинишича, Лондондаги ноқулай об-ҳаво шароити туфайли рейслари қолдирилган авиакомпаниялар орасида KLM, Lot, Brussels Airlines ва United каби номларни учратиш мумкин.

Метеорологларнинг маълумотига кўра, Лондонда айни вақтда 50 метрдан узоқни кўриб бўлмаяпти.

Қайд этилишича, бу вақтда қиролликнинг ғарбий ҳудудида иссиқ ҳаво кузатилмоқда. 1 ноябрь куни Уэльсда ҳаво ҳарорати 22,4 даражага етган.

Интернет фойдаланувчилари твиттерда #foggy ҳэштеги орқали твитлар ёзиб, турли ҳудудлардан суратлар жойлаштиришмоқда.