Бузғунчи шахслар Массачусетс штатининг Бостон шаҳри яқинидаги ҳудудда жойлашган масжид деворига USA сўзларини турли шаклларда ёзиб кетишди. Бу ҳақда 1 ноябрь куни Америка-Ислом жамияти маълум қилган.

Жамиятнинг Бостондаги бўлими раҳбари Жон Роббинснинг маълум қилишича, бу воқеа юзасидан АҚШ ФҚБга текширув ўтказиш сўралиб, мурожаат қилинган.

Унинг баҳолашича, бу ҳаракат америкаликлар орасида аксилмусулмончилик қарашлари ёйилишига хизмат қилиши мумкин.

Бу воқеа бўйича ҳисобот Берлингтон полиция бошқармасига юборилган. Шунингдек, бу ҳолат тасвирлари интернетда тарқалиб кетган.

Ушбу масжид Бостон ислом маркази ҳудудида жойлашган. Масжид сайтида ушбу бузғунчиликни амалга оширган шахслар аниқланишида ёрдам беришни сўраб мурожаат қилинган.