Германиянинг автомобил ишлаб чиқарувчи Porsche концерни бутун дунё бўйлаб 60 мингта жип моделидаги Macan S ва Macan Turbo моделли автомобилларини қайтариб олади, дея хабар беради Deutsche Welle.

Германиянинг ўзида 3,64 минг дона автомобил ортга қайтарилади. Корхона бунга сабаб сифатида ёқилғи узатиш тизимидаги носозликни кўрсатиб ўтган. Porsche автомобил эгаларига салонда ёқилғи ҳиди сезила бошлаганда, уни дарҳол яқин ҳудудда жойлашган компания хизмат кўрсатиш марказига етказишларини маслаҳат бермоқда.

Юқорида номи келтирилган манбанинг қайд этишича, бу Porsche тарихидаги энг кўп машиналарни ортга қайтариб олиш бўлмоқда. 2014 йилда автоконцерн бутун дунё бўйича 189 850 дона автомобил сотган. 2015 йилда компания 200 мингдан кам бўлмаган миқдорда машина сотишни режалаштирган.