Суд-тиббиёти экспертлари Синай яриморолида ҳалокатга учраган A321 самолёти йўловчиларининг ўлими сабабларини маълум қилди. Йўловчилар куйиш, қаттиқ зарбалар ва ички аъзоларнинг ёрилиши натижасида ҳаётдан кўз юмган. Бу ҳақда LifeNews ҳуқуқни муҳофаза қилиш органларидаги ахборот манбалари маълумотига асосланиб хабар берди.
Қайд этилишича, кўплаб йўловчиларнинг вафотига бир вақтда бир нечта омиллар сабаб бўлган.

Шу вақтга қадар авиаҳалокатнинг 100 нафар қурбонининг жасади ўрганилган. Ўлимга олиб келган аниқ сабаб ва вафот этган вақтни аниқлаш учун эса энг камида 15та текширувни ўтказиш талаб қилинади.

Эслатиб ўтамиз, 2015 йилнинг 31 октябрь куни Россиянинг "Когалимавиа" авиакомпаниясига тегишли Airbus-321 лайнери парвозга кўтарилгандан 23 дақиқа ўтиб радарлар экранидан йўқолган эди. Мазкур самолёт бортидаги 217 нафар йўловчи ва етти нафар экипаж аъзосининг барчаси ҳалок бўлган.