Синайга қулаб тушган А321 самолёти учувчилари ҳалокат вақтига қадар ҳеч қандай техник носозлик ҳақида билишмаган. Бу ҳақда Қоҳирадаги манбасига асосланиб, "Интерфакс" хабар берган.

А321 самолётининг қулаши бўйича олиб борилаётган терговга яқин манбанинг хабар беришича, «қора қути»дан қулаган рус самолёти бўйича олинган маълумотда "Экипаж учувчиларининг мулоқоти ўрганиб чиқилганида, самолёт радарлардан йўқолишига 4 дақиқа қолган вақтда ҳам улар ҳеч қандай носозликни сезишмаган ва диспетчерлар билан одатдагидай гаплашиб кетишган. Улар танг вазият мавжудлиги ҳақида хабар қилишмаган", дейилади манбада.

Унинг айтишича, "қора қути"да ҳеч қандай нохуш товушлар ҳам ёзилмаган. Учувчилар танг вазиятга тушганлари ҳақида хабардор этишмаган.

Бироқ унинг айтишича, лайнер радарлар экранидан йўқолиш вақтида ёзувда одатдаги парвоз учун хос бўлмаган товуш қайд қилинган.

“Ёзувга кўра, бортдаги фавқулодда вазият тўсатдан содир бўлиб, учувчилар учун кутилмаган ҳолат пайдо бўлган, шу сабабли экипаж фалокат сигналини юбора олмай қолган”, - деди ахборот манбаси.

Эслатиб ўтамиз, 31 октябрь куни Миср вақти билан 6:51 да (Тошкент вақти билан 9:51) Россиянинг "Когалимавиа" авиакомпаниясига тегишли Шарм аш-Шайх — Санкт-Петербург йўналиши бўйича 9268 рейсини амалга ошираётган Airbus-321 лайнери парвозга кўтарилгандан 23 дақиқа ўтиб радарлар экранидан йўқолди. Мазкур самолёт бортида 217 нафар йўловчи ва етти нафар экипаж аъзоси бўлган.