Мисрда ҳалокатга учраган Россияга тегишли А321 авиалайнерининг йўловчилари таналари суд тиббий экспертизасидан ўтказилиб, унинг натижалари Россия матбуотида эълон қилинди.

Хулосага кўра, йўловчиларнинг барчаси турли хилдаги жароҳатлар оқибатида ҳаётдан кўз юмган.

Петербурглик тиббий экспертлар ҳалок бўлганларни икки гуруҳга бўлишди. Биринчи гуруҳга таналари самолёт ҳалокати ерига яқин жойдан топилганлар киритилди. Улар қон йўқотишдан, шокдан, очиқ бош суяги ва мия жароҳатлари ҳамда кўплаб синишлар оқибатида ҳаётдан кўз юмишган.

Иккинчи гуруҳдагилар эса лайнернинг дум қисмида ўтирганлар бўлиб, “портловчи” жароҳатлардан ҳалок бўлишган. Уларнинг аксарияти 90 фоизга куйиб кетгани аниқланди. Ёниб кетган тана қисмлари портловчи моддаларга текширилади. Аммо экспертлар ҳозирча бу гуруҳдаги кишиларнинг танасида самолёт қопламасидан ажралиб чиққан металл парчалари борлигини аниқлашди.
Бу борада ҳозирча бошқа ахборот йўқ.
Айни пайтда, ТАССнинг хабар беришича, экспертлар аэробуснинг борт журналларини таҳлил қилишга киришишди. Тўртта “қора қути” Қоҳирада ўрганилмоқда.