Гонконг валюта заҳиралари миқдори 1,9 фоизга ёки 8,2 млрд долларга (63,8 млрд Гонконг доллари) камайиб, ўзининг 30 йиллик тарихида энг катта зиённи қайд қилди. Бу ҳақда Гонконг пул муомаласи бошқармаси раҳбари Норман Чанга иқтибос келтирган ҳолда Financial Times нашри хабар берди. Бу зарар АҚШнинг энг йирик банкларидан бири Lehman Brothers банкротга учраганда 2008 йилда кузатилган жаҳон молиявий инқирози пайтидагидан ҳам кўпроқни ташкил қилди. Гонконг ўшанда 41,1 млрд Гонконг доллари миқдорида зиён кўрган эди.

Бунда зиёнларнинг асосий қисми Гонконг фонд биржасида сотилувчи акция нархларининг пасайишига тўғри келди. Савдо майдони капитализациясининг камайиши Гонконгга 30,7 млрд Гонконг доллари, Гонконг захира жамғармаси инвестиция киритган хорижий активлар нархининг пасайиши яна 34,1 млрд Гонконг доллари миқдорида зиён келтирди.

“Глобал молиявий бозорлар дастлабки уч чорак давомида жуда беқарор бўлди. Биз кучли доллар туфайли хорижий валютада зиён кўрдик, шу билан бирга Гонконг бозоридаги акциялар кескин пасайишга монанд жавоб бермоқда”, деб айтди Норман Чан.

Bloomberg агентлигининг маълум қилишича, капиталнинг қайтиб кетишини камайтириш ва Хитой фонд бозорида “кўпикнинг шишиши” оқибатларини бартараф этиш мақсадида Хитой ҳукумати қимматбаҳо қоғозлар бозорини эркинлаштиришга қарор қилди.