Ўзбекистон президенти Ислом Каримов Россия президенти Владимир Путинга Мисрда Россия самолётининг ҳалокатга учраши юзасидан ҳамдардлик билдирди. Бу ҳақда Кремль сайтида хабар қилинган.

Эслатиб ўтамиз, 31 октябрь куни юз берган авиаҳалокатда «Шарм аш-Шайх — Санкт-Петербург» 9268 рейси билан учаётган А321 самолёти бортида бўлган 217 нафар йўловчи ва 7 нафар экипаж аъзоси ҳалок бўлди.

1 ноябрь куни Россияда уларнинг хотирасига мотам эълон қилинди.

Уч кундирки, Тошкент аҳолиси шанба куни Мисрнинг Синай ярим оролида қулаб тушган Metrojet авиакомпанияси самолётида ҳалок бўлган йўловчилар хотирасига Россиянинг Тошкентдаги элчихонасига гул келтирмоқда.

Россиянинг Ўзбекистондаги элчихонасида Мисрда фалокатга учраган самолёт қурбонлари хотирасига таъзиялар китоби очилган.

"Биз телефон орқали, мактублар юбориб, ижтимоий тармоқларда ва элчихонага келиб, ўз ҳамдардликларини изҳор этаётган ўзбекистонликлардан миннатдормиз. Россия дипломатия миссияси дарвозаси олдида гул, мотам гулчамбарлари, шам ва ёзувларни кўриш мумкин. Ўткинчилар тўхтаб, авиаҳалокат қурбонлари хотирасига ҳурмат бажо келтирмоқда", дейилади Россиянинг Тошкентдаги дипломатия миссияси хабарида.