КХДР етакчиси Ким Чен Ин ракетали қурилма синовдан ўтказилган ҳаво ҳужумидан мудофаа қисмлари ўқув машғулотларини шахсан кузатди, дея 2 ноябрь куни хабар берди Корея Марказий телеграф агентлиги.

“Ўқув машғулотлари модернизацияланган ҳаво ракеталарининг техник тайёргарлиги ва фронтнинг шарқий участкасида ҳаво ҳужумидан мудофаа ҳарбий қисмларининг ҳақиқий уруш шароитларида жанг олиб бориш салоҳиятини текширувдан ўтказишга йўналтирилди”, - дея хабар бермоқда Шимолий Корея агентлиги.

Унинг маълумотига кўра, ракеталар синови ҳаво ҳужумидан мудофаа қўшинлари ҳарбий тайёргарлигида ўзгаришлар жорий этиши лозим бўлган янги турдаги зенит ракеталарини ишлаб чиқиш йўлларини қидириш мақсадида ўтказилмоқда.
Шимолий Кореяда бўлиб ўтаётган ҳарбий машғулотлар муддати маълум қилинмаган.

Жанубий Кореянинг Рёнҳап агентлиги маълумотига кўра, КХДРнинг ушбу ўқувлари Сеул томонидан ишлаб чиқилган шимолликларнинг ядро, кимёвий ёки бактеорологик моддалар қўлланилган ракеталарини аниқлаш, улар бошқарувига халал бериш, йўқ қилиш ва ракета зарбаларидан ҳимоялашга қаратилган 4D тезкор режасига жавоб сифатида ўтказилмоқда. Мазкур режа яқиндагина Сеулда АҚШ ва Корея Республикаси мудофаа вазирлари Эштон Картер ҳамда Хан Мин Гу ўртасидаги учрашувда тасдиқланган эди.