“Воҳа” газетасида мақоласи чоп этилган Ислом Матеков Нукусдаги 3D кинотеатрларида кўп қўйилаётган “ваҳшиёна” фильмларни танқид остига олди.

“Аммо шаҳримиздаги бундай томошагоҳларда намойиш этилаётган кўпгина фильмларнинг номларини эшитишданоқ кўнглимиз хижил бўлиб кетади: “Ангелы и демоны”, “Мёртвый дом”, “Гробницы фараона”. Кинотеатрларга ташриф буюраётганларнинг барчаси ёшлар. Юқорида номлари зикр этилган ваҳшиёна фильмларни томоша қилиш учун ота-оналар ҳали оқ-қорани танимайдиган кичкина болалари билан навбат кутмоқда”, - деб ёзади у.

Муаллифнинг фикрича, бундай фильмлар ёш авлоднинг онгига салбий таъсир кўрсатиши мумкин.

Бундан ташқари, у тажриба сифатида “Мёртвый дом” фильмини томоша қилганини айтиб, бу фильмдан олинган таассуротлар билан ўртоқлашди.

“Фильмда уй ичида ўлик одамлар ерда ётар, ҳар хил қўрқинчли овозлар эшитилар, ҳар дамда устимизга қон сепилар ва ўлик одамлар тирилиб, оёқларимиздан тортарди. Бундай вазиятларни нафақат томоша қилиш, балки гапириб беришнинг ўзи ҳар қандай одамда ваҳима уйғотиши аниқ. Биз ҳам 3-4 дақиқадан сўнг у ердан чиқдик, аммо кулиб ёки ажабланиб эмас, қўрқувдан йиғлаб, довдираб, изимизда навбат кутиб турганлар ҳам кўзимизга ажинадек кўриниб кетди”, - дейди Матеков.