Буюк Британия бош вазири Дэвид Кэмерон Сурияда ИШИД позицияларига зарбалар бериш борасидаги қонун лойиҳасини парламентда овоз беришга қўймайди. Бу ҳақда Times нашри ёзмоқда.

Айтилишича, бош вазир мухолиф Лейбористлар партияси депутатларининг катта қисмини ушбу қонун лойиҳасининг зарурлигига кўндира олмагани боис ўз ташаббусидан воз кечишга мажбур бўлган.

2014 йил сентябрида Британия парламенти ИШИДнинг фақат Ироқдаги позицияларига зарбалар беришни маъқуллаган эди. Улар қабул қилган ҳужжат Сурияда ҳам шундай операциялар ўтказишни кўзда тутмаган эди.