Жорий йилнинг апрель ойида бошланган “Ўзбекистоннинг етти мўъжизаси” акцияси ниҳоят якуний босқичга етиб келди.

Якуний босқич талабларига мувофиқ, Ziyo.Net ахборот ресурс тармоғининг “Ўзбекистоннинг маданий мероси” бўлимига кириб ўзингиз маъқул деб топган маданий мерос ва мамлакатнинг моддий бойлиги кўрсатилган саҳифага кириб унга овоз беришингиз ҳамда Ўзбекистоннинг “Етти мўъжиза”ларини аниқлашга ўз ҳиссангизни қўшишингиз мумкин.

Ҳар бир моддий ва номоддий маданий мерос объектига кун давомида бир марта овоз бериш имконияти бор. Овоз бериш декабрь ойининг бошигача давом этиб, энг кўп овоз олган объектлар якуний рўйхатга киритилади.

Kun.uz таҳририятига йўлланган матбуот хабарномасида таъкидланишича, акцияни ўтказишдан асосий мақсад “юртимизнинг моддий (архитектура ва археологик ёдгорликлар, табиат мўъжизаларини) ва номоддий меросни (урф-одат, анъана, қадрият, санъат) келажак авлодга етказиш ҳамда тарғиб қилиш учун ягона базага тўплаш” дир.

Ушбу акциянинг ўтказиш майдони ZiyoNET ахборот ресурс тармоғининг “Ўзбекистоннинг маданий мероси” бўлими ҳисобланиб, унда порталдан рўйхатдан ўтган истаган киши иштирок этса бўлади. Ҳозирги кунга келиб акция доирасида 374та мерос объектлари бўлимга киритилди.

Акция якунига кўра, энг кўп овоз тўплаган моддий ва маънавий мерос объектлари тантанали тадбирда эълон қилинади.