Саудия Арабистонида нотурар жой биноларида истеъмолчилар учун сув нархи оширилади. Бу ҳақда маҳаллий ОАВларга иқтибос келтирган ҳолда Reuters ахборот агентлиги маълум қилди.

Маҳаллий ОАВ маълумотларига кўра, 2015 йил 16 декабрдан саноат ва ҳукумат биноларида ҳамда йирик корпорациялар биноларида сув нархи 2 баробардан кўпроққа, яъни 1 куб метри нархи 9 риалгача (2,4 доллар) оширилади.

Мамлакат маъмуриятидаги номаълум манбанинг маълумотига кўра, сув нархи унинг истеъмол қилинишини камайтириш ва меъёрдан кўп ишлатилишига қаршилик кўрсатиш мақсадида оширилмоқда.

Турар-жой биноларида яшовчилар сувга эски нархда ҳақ тўлайверадилар. Сув нархининг оширилиши нефть нархи тушиши сабабли 100 млрд долларгача ошган бюджет дефицитини қоплаш учун ҳам қаратилган.

Бу энергиядан фойдаланишни ҳам камайтиради, чунки сувнинг катта қисми чучуклантирувчи қурилмалар орқали олинади.