Сингапур ҳукумати ҳудуддаги кучли тутун натижасини “инсон томонидан амалга оширилган жиноят”, деб баҳолади ҳамда уни экологияга қаттиқ зарари бор, деб кўрсатди. Бу ҳақда 3 ноябрь куни мамлакат ташқи ишлар вазири Вивиан Балакришнан таъкидлаб ўтган.

Унинг сўзларига кўра, қўшни давлатлар — Бруней, Малайзия, Сингапур, Таиланд ва Филиппинга зарар етказган ушбу ҳолат беэътибор қолдирилмаслиги ҳамда жиноятчиларга нисбатан “самарали ҳуқуқий ва тижорий босим ўтказиш лозим”. Чора-тадбирлар “иложи борича очиқ кўринишда ўтиши керак”, деб қўшимча қилди вазир.

Аввалроқ Сингапур ҳукумати ўз ҳамкасбларидан ушбу ёнғинда алоқаси бор компаниялар рўйхатини тақдим этишни сўраган эди. Сингапур қонунчилигида ёнғин келтириб чиқарган юридик шахс ҳар кунги тутунли ҳаво учун 72 минг АҚШ доллари ҳисобида жарима тўлаши шарт.