Твиттер микроблоглар тармоғидаги "Favorite" (ёқтирганликни билдириш, русчада "Избранное") тугмачаси “юлдузча” кўринишида эди. 3 ноябрь куни эса ушбу белги “юракча”га алмаштирилди.

Шунингдек, авваллари "Favorite" деб номланган “юлдузча” тугмасининг белгиси ўзгариши билан номи ҳам алмашди. Энди унинг ўрнида "Like" номидан фойдаланилмоқда.

Эслатиб ўтамиз, октябрь ойининг бошида Твиттер асосчиларидан бири Жек Дорси яна компания раҳбарлиги лавозимига қайтган эди. Унинг янги фаолияти эса тармоққа бир қанча ўзгаришлар олиб келмоқда.

Масалан, яқинда эълон қилинган Twitter Moments хизмати бирор оммабоп воқеа атрофидаги барча твитларни бир жойга тўплайди. Шунингдек, бир неча кун олдин Твиттерда сўровнома ташкил қилиш имконияти барча учун фойдаланишга топширилди.