Япония Тожикистон, Афғонистон ва Қирғизистонда чигирткаларга қарши кураш лойиҳасига 5 млн доллар ажратади. Лойиҳа уч йилга мўлжалланган бўлиб, ўтган йили “Марказий Осиё Япония” диалоги доирасидаги ТИВлар учрашувида Тожикистон ташаббуси билан имзоланган эди.

Чигирткалар ушбу мамлакатлардаги қишлоқ хўжалигига жиддий зиён келтиради. Қадимдан Ўрта Осиёда чигирткалар деҳқонларнинг асосий душманларидан бири ҳисобланган. Уларга қарши курашнинг турли услублари ишлаб чиқилган, лекин уларнинг бари ҳам етарли натижани бермайди.

“Тожикистоннинг тўрт вилоятидан учтасида мунтазам равишда чигирткалар ҳужуми кузатилади, бу охирги ўн йиллик маълумотларида яққол кўринади, - деди Тожикистон қишлоқ хўжалиги вазирининг ўринбосари Жамила Саидова. – Айниқса Хатлон вилоятининг жануби зарар кўради, кейинроқ Сўғд вилояти ҳамда республика тобелигидаги туманлар келади”.