Фарғонада илк марта юрак операцияси ўтказилди

Ўзбекистон 04 Ноябрь 2015 3058

Фарғонада илк марта юрак операцияси ўтказилди. Бу ҳақда Ўзбекистон Миллий ахборот агентлиги хабар берди.
Хабарда келтирилишича, Фарғона вилоят кўп тармоқли болалар тиббиёт марказида илк бор туғма юрак нуқсони билан даволанаётган икки нафар болада мураккаб жарроҳлик амалиёти муваффақиятли амалга оширилди.

Фарғона вилоятида 18 ёшгача бўлган ўғил-қизларга юқори малакали тиббий хизмат кўрсатишга ихтисослашган вилоят кўп тармоқли болалар тиббиёт маркази 2013 йили замонавий бинога кўчиб ўтди. 2014 йилда эса янги даволаш корпуси фойдаланишга топширилди. Марказ фаолияти кенгайиб, жарроҳлик, реанимация, ортопедия, пульманология, гастроэнтерология, кардиоревматология, неврология бўлимлари қаторига офтальмология ва урология бўлимлари ҳам қўшилди. Айни кунларда бу ерда илғор усуллар асосида мураккаб жарроҳлик амалиётлари ҳам ўтказилмоқда.

Марказда кўрсатилаётган тиббий хизмат сифатини янада яхшилаш мақсадида туғма юрак нуқсони ташхиси билан диспансер назоратида турган беморларни жарроҳлик йўли билан даволаш йўлга қўйилмоқда.
Жаҳон соғлиқни сақлаш ташкилоти маълумотига кўра, дунёда ҳар минг чақалоқнинг 6-7 нафарида туғма юрак нуқсони қайд этилади. Бу хасталикни операция йўли билан бутунлай бартараф этиш ва беморни тўлақонли ҳаётга қайтариш мумкин.
Мамлакатимизда бундай хасталик аниқланган бемор болаларни соғломлаштириш борасида салмоқли ишлар амалга оширилмоқда.

Мазкур марказда илк бор ўтказилган туғма юрак нуқсони билан даволанаётган болалардаги жарроҳлик амалиёти ана шулардан биридир.
Фурқат туманининг Томоша қишлоғида яшовчи Мирзахўжа Ниёзхўжаев 1999 йилда туғилган. У туғилганидан буён диспансер назоратида туради. Бемор ҳансираш, юракнинг тез-тез уриши, ҳолсизлик каби шикоятлар билан шифохонага ётқизилган.
Қўштепа туманидан Икромжон Иброҳимов эса уч ёшда. У ҳам туғма юрак нуқсони, очиқ артериал проток ташхиси билан диспансер назоратига олинган.

Ҳар икки беморда туғма юрак нуқсони – очиқ артериал протокни боғлаб қўйиш операцияси муваффақиятли амалга оширилди ва реанимация бўлимида интенсив муолажалар олиб борилди. Болаларнинг аҳволи стабиллашгач, муолажаларни давом эттириш учун жарроҳлик бўлимига ўтказилди.
– Ўғлим озгина юрса ҳам, ўйнаса ҳам тез чарчаб, лаблари кўкариб кетарди, – дейди Икромжоннинг онаси Дилрабо Фозилова. – Уч ёшли бола ўзининг чарчаётганини, ҳолсизланиб бораётганини сезарди. Охирги пайтларда сал юрса, “Кўтаринг” дейдиган бўлиб қолди.

Умид қиламанки, боламнинг дарди ортда қолди. Шифокорларга минг раҳмат.
Жарроҳлик амалиётида вилоят кўп тармоқли болалар тиббиёт маркази кардиохирурги Жавлон Мўйдинов, жарроҳлик бўлими мудири Иброҳим Умаров, тиббиёт фанлари номзодлари – Андижон давлат тиббиёт институти клиникаси кардиохирурги Абдуносир Турғунов ва Республика ихтисослаштирилган кардиология марказининг анестезиолог-реаниматологи Санжар Омонов иштирок этди.

– Шу чоққача бундай операция Тошкентда ёки хорижда амалга ошириларди, – дейди болалар жарроҳи, “Эл-юрт ҳурмати" ордени соҳиби Иброҳим Умаров. – Энди бундай мураккаб операцияларни вилоятимизда амалга ошириш имконияти яратилди. Қанчадан-қанча болажонларни даволаб, ота-оналар кўзига қувонч қайтаришимиз мумкин. Бу борада биринчи қадам ташланганидан ва амалиёт муваффақиятли ўтганидан хурсандмиз.

Кун янгиликлари
Ҳурматли абитуриентлар, сизнинг ҳали Олий ўқув юртига ўқишга кириш имкониятингиз бор!
09:55 17460 Lifestyle
Фарғона вилояти ҳокими Сўх тумани, уй-жой муаммоси, табиий газ ва аҳолининг бошқа муаммолари ҳақида (видео)
20:30 / 21.08.2017 22493 Жамият
Artel Technical School «Келажак мактаби» ўқув нархларини пасайтирмоқда!
20:02 / 21.08.2017 11418 Жамият
KUN.UZ хайрия акцияси: Жаҳонгирнинг бир оёғида операция ўтказилди, йигит барчадан миннатдор
19:03 / 21.08.2017 12305 Жамият
Ўзбекистон қачонгача ривожланаётган давлатлар қаторида қолади?
16:20 / 21.08.2017 40736 Ўзбекистон
Ногиронлик ва мазлумлик исканжасида: бир аёл яхшилар саховатидан умидвор 
15:55 / 18.08.2017 53001 Жамият
Кун.uz офис изламоқда
15:48 / 06.08.2017 47770 Lifestyle
Янги Android O тизимидан нималар кутиш мумкин?
Зафар Ҳошимов лотин алифбоси, ўзбек тилининг мавқеини ошириш ва чет тилларга ҳурмат сақлаш ҳақида
Япония ТИВ раҳбари: КХДР ядро дастуридан воз кечмагунга қадар унга босим ўтказиш керак
15:40 669 Жаҳон
Кўпроқ янгиликлар