Ҳиндистон пўлат қуювчи компанияси SAIL’нинг маълум қилишича, у ўтган йили экспортчи сифатида чиқувчи Ҳиндистон давлат савдо компанияси STC билан тузган шартномасига кўра, Эрон темир йўллари учун 18 метрлик темир йўл рельслари ишлаб чиқаради.

Ҳиндистон савдо ва саноат вазирлиги вакилининг маълум қилишича, STC компанияси Эрон билан тузган шартномасига кўра, Эронни зарур бўлган пўлат маҳсулот билан таъминлаш мажбуриятини ўз зиммасига олди. Эронда темир йўл тармоғини кенгайтириш учун 3 млн тонна рельс маҳсулоти талаб этилади ва STC компания 100 минг тонна рельс экспорт қилади.

iran.ru нашрининг маълум қилишича, айни пайтда SAIL компанияси Ҳиндистон темир йўллари учун 13 метрдан 26 метргача узунликда рельслар ишлаб чиқаради. Бироқ компания Эрон учун керак бўлган 18 метрлик рельслар ишлаб чиқармайди ва Эрон буюртмасини бажариш учун хориждан қурилма импорт қилишга мажбур бўлмоқда. SAIL расмий вакилининг таъкидлашича, бундай қурилмалар хориждан, жумладан Австрия ва Германиядан сотиб олинади.

Ҳинд матбуотининг ёзишича, Эрон яқин 10 йил ичида ўзининг темир йўлларини модернизация қилиш учун 25 млрд доллар сарфламоқчи. Бу 2025 йилгача мамлакатдаги темир йўллар умумий узунлигини 15 минг километрдан 25 минггача ошириш имонини беради.