Жаҳон банки ижрочи директорлари кенгаши 3 ноябрь куни Халқаро тараққиёт уюшмасига Орол денгизи ҳавзасида иқлим ўзгариши оқибатларига мослашиш ва уларни юмшатиш дастурининг биринчи босқичига 38 млн доллар маблағ ажратишга рози бўлди.
Банк матбуот хизматининг хабар қилишича, минтақавий дастурнинг биринчи фазаси доирасида Тожикистонга 9 млн, Ўзбекистонга 14 млн доллар ажратилади. Яна 15 млн доллар минтақавий фаолиятни амалга оширишга сарфланади. Икки йил давомида дастурга минтақанинг бошқа давлатлари ҳам қўшилади.

Дастурдан кўзланган мақсад минтақавий ҳамкорликнинг устунлик жиҳатларидан иқлим ўзгариши билан боғлиқ равишда юзага келаётган муаммоларни ҳал қилишда самарали фойдаланишдир. Жаҳон банкининг “Иссиқликни камайтиринг: янги иқлимий меъёрга қаршилик кўрсатиш” ҳисоботида таъкидланишича, Ўрта Осиё давлатларида бутун дунё бўйича ўрта кўрсаткичга нисбатан ҳаво исиши анча кучлироқ бўлади. Агар дунё бўйлаб ўртача ҳаво ҳарорати 4 даражага ўсса, минтақада бу кўрсаткич 7 даражани ташкил қилиши мумкин.