Мисрда Россиянинг А321 самолёти қулаган жойда қидирув операцияси якунланди, деб хабар бермоқда Мисрнинг “Ал-Ҳаят” телеканалига иқтибос келтирган ҳолда РИА “Новости” ахборот агентлиги. 

Бу ҳақда Миср ҳукуматининг расмий вакили  Ҳусам ал-Ковиш маълум қилди.

“Синай яримороли марказидаги қидирув-қутқарув операцияси якунланди. Миср ҳукумати энди барча умидни асбоблар кўрсаткичлари ва экипажнинг ўзаро суҳбатини ёзиб олувчи “қора қутилар” га боғламоқда”, деб айтди ал-Ковиш.  

Аввалроқ Россия Тергов қўмитаси раиси Александр Бастрикин Мисрда самолёт фалокати оқибатлари ва тафсилотларини аниқлаштираётган Россия Тергов қўмитаси, Фавқулодда вазиятлар вазирлиги, Давлатлараро авиация қўмитаси ва транспорт вазирлиги вакиллари билан штаб йиғилиши ўтказди. Бастрикин терговчиларнинг қилинган ишлар бўйича ҳисоботини тинглагандан кейин, “яқин икки кун ичида терговчилар ва криминалистларга самолёт қулаган жойда ишларни якунлашга кўрсатма берди”.