Бугун, 4 ноябрь куни Қашқадарёда Ўзбекистон Олий лигасининг 29-тури доирасида “Насаф” ва “Пахтакор” ўртасида учрашув ўтказилди. Унда 0:1 ҳисоби қайд этилиб, меҳмонлар навбатдаги 3 очкога эга бўлишди.

Бу ўйиндаги ғалаба тошкентликларнинг навбатдаги чемпионлик учун имкониятларини янада оширар эди. Шу туфайли ўйинда кичик устунлик “Пахтакор” томонда бўлди.

Қаршидаги ўйиннинг дастлабки бўлимида ҳисоб очилмади. 78-дақиқада бурчак зарбаси ўйинга киритилгач, Ҳошимов тўпни жарима майдонига оширди. Камолиддин Тожиев эса яқин масофадан дарвозани ишғол қилди - 0:1. Учрашув охирига қадар таблодаги 0:1 ҳисоби сақланиб қолди.

Шу куни "Пахтакор"нинг асосий рақиби "Локомотив" "Машъал"ни 1:0 ҳисобида мағлубиятга учратди ва очколари сонини 71тага етказди.

Эндиликда, турнир жадвалида биринчи ўринда 72 очко билан "Пахтакор" биринчи ўринда турибди. "Локомотив"да эса 71 очко бор. "Насаф" учинчи ўрин масаласини ҳал қилиб бўлган.

Ўзбекистон Олий лигаси, 29-тур

"Насаф" — "Пахтакор" 0:1 (0:0, 0:1)
Гол: 0:1 – 78 Тожиев
"Насаф": Юсупов, Муҳаммадиев, Аъзамов, Каримов, Сайфиев, Бойдуллаев, Абдураҳимов, Гадоев (Ғаниев, 64), Геворкян (Алланиязов, 77), Ҳамробеков, Шомуродов.
"Пахтакор": Лобанов, Тожиев, Кримец, Ҳошимов, Андреев, Соҳибов, Махарадзе, Искандеров (Мерзляков, 58, Каримов (Козак, 72), Машарипов, Сергеев.