Яқин вақтлар ичида Қирғизистоннинг 85 фоиз ҳудуди юқори тезликдаги интернет билан таъминланади. Бу ҳақда 4 ноябрь куни Жўқорғу Кенеш депутатлари олдида чиқиш қилган мамлакат бош вазири Темир Сариев  маълум қилди.

Унинг таъкидлашича, янги ҳукуматнинг олдига бюрократияни қисқартириш ва электрон ҳужжат алмашинувини жорий этиш каби вазифалар қўйилган. Унинг сўзларига кўра, 2016 йилда мамлакатдаги уч вилоятда аҳолига хизмат кўрсатувчи янги авлод марказлари ишга тушади ва фуқароларнинг биометрик маълумотларини тўплаш ишлари давом эттирилади.