Туркия ҳарбийлари Туркияда тақиқланган Курдистон ишчи партиясининг (КИП) 15 жангарисини мамлакатнинг жануби-шарқида, Ироқ билан чегара яқинидаги тўқнашувлар давомида йўқ қилди. Бу ҳақда Reuters ахборот агентлиги маълум қилди. Шунингдек, 2 нафар турк ҳарбийси ҳам ҳалоқ бўлган.

Агентлик маълумотларига кўра, ердаги операция 3 ноябрда Анқара Хаккарий вилоятидаги Доғлиқ туманида КИП жангарилари позицияларига авиазарбалар бергандан кейин амалга оширилган.

Курдларнинг асосий сиёсий ҳаракати – КИП ва Туркия ўртасидаги муносабатлар 20 июлда Суруч шаҳрида теракт содир бўлгандан кейин кескинлашиб кетди.

АҚШ КИПни террорчилик ташкилоти деб ҳисоблайди, бироқ Суриядаги курд исёнчилари Вашингтоннинг ИШИДга қарши курашдаги муҳим иттифоқчиси ҳисобланади. Турк аэродромлари АҚШ томонидан ИШИД позицияларини бомбардимон қилиш учун ишлатилади. Бу орада Анқара асосан Ироқ шимолидаги КИП позицияларига зарбалар бериб келади.