Анқара Ироқнинг курд минтақавий маъмуриятини (ИКММ) барқарорлик омили деб қабул қилади, деб айтди Туркия ташқи ишлар вазири Фаридун Синирлиўғлу Шимолий Ироқ курд муҳторияти бош вазири Нечирван Борзоний билан Ироқнинг Эрбил шаҳрида ўтказилган музокаралардан кейин.

Учрашув курд муҳторияти ҳукумати раҳбари маъмуриятида ёпиқ эшиклар ортида ўтди.

“Туркия ва ИКММ ўртасидаги ҳамкорлик барча соҳаларда кенгайтирилмоқда. Айниқса бу ҳамкорлик террорни йўқ қилишда жуда муҳимдир. Туркия ИКММга барқарорлик омили сифатида қарайди. Шу муносабат билан икки томонннинг биргаликдаги иши муҳим аҳамиятга эга”, деб айтди Синирлиўғлу.

Ўз навбатида Нечирван Борзоний Туркия ТИВ раҳбарини мамлакат парламентига сайловларнинг муваффақиятли ўтгани билан табриклади. У Туркиянинг янги ҳукумати қисқа муддатларда шакллантирилишига ҳамда Анқара ва Эрбил ўртасидаги ҳамкорлик янада мустаҳкамланишига умид билдириб қолди.