Беларусь президенти Александр Лукашенко 4 ноябрда Беларусь миллий валютаси деноминация қилиниши (пул қиймати ўзгартирилиши) ҳақидаги қарорни имзолади. Бу ҳақда Лукашенко матбуот хизмати маълум қилди.      

Ҳужжатга кўра, 2016 йил 1 июлдан мамлакат миллий валютаси – Беларусь рубли деноминация қилиниб, 2016 йилнинг 31 декабригача муомалада бўлган 2000 йилда чиқарилган пуллар 2009 йилда чиқарилган пулларга 10 минг рублга 1 рубль қийматида ўзгартирилади, яъни пул қиймати 10 минг марта камайтирилади.

Беларусь Миллий банкида таъкидланишича, “деноминация жараёни техник характерга эга бўлиб, беларусь рублининг харидорлик қобилияти, миллий валютанинг хорижий валюталарга курси, инфляция даражасига таъсир қилмайди”.

2016 йилнинг 1 июлидан товар ва хизматлар учун нархлар 1:10000 нисбатда қайта ҳисобланади. “100 минг рубль турган товар деноминациядан кейин 10 рублни ташкил қилади. Харидорларга янги ўзгаришларга осонроқ мослашишлари учун эски ва янги пул бирликлари параллел равишда 2016 йилнинг 31 декабригача муомалада бўлган вақтда барча хўжалик субъектлари иккита нарх – эски ва янги нархни кўрсатишлари керак бўлади. Шу қоида асосида ойлик маошлар, пенсиялар, банк ҳисоб рақамларида қолган пул маблағлари, корхона ва ташкилотларнинг балансларидаги маблағлар қайта ҳисобланади”, деб айтилди Беларусь Миллий банкида.