“Эрон темир йўллари” компанияси бош директори ўринбосари Ҳасан Ашурий Тошкентда бўлиб ўтган МДҲ давлатлари темир йўл транспорти кенгаши йиғилишида Эрон Марказий Осиё давлатлари билан темир йўл транспорти соҳасида ҳамкорликни кенгайтириш ниятида эканлигини айтди.

Ашурий Тошкентда бўлиб ўтаётган кенгашнинг 63-йиғилиши кенгаш аъзолари бўлган давлатлар ўртасида муваффақиятли ҳамкорликка кўмак беришини таъкидлаб ўтди ва Эрон бу кенгашга уч йил аввал қўшилганини эслатиб ўтди.

Ашурий Эрон ва Кенгаш аъзолари ўртасидаги ҳамкорликнинг натижаларини ижобий баҳолаб, кенгашга аъзо давлатларга ўз экспортини ривожлантириш мақсадида Эрон бу кенгашга кирувчи бир қатор давлатлар, жумладан Ўзбекистон, Туркманистон ва Тожикистон темир йўл вагонларидан фаол фойдаланишини айтди.

Ашурий Эрон ва Ўзбекистон темир йўл транспорти соҳасидаги ҳамкорлик масаласи ҳақида гапирар экан, охирги йилларда бу ҳамкорлик сезиларли ривожланишга эришганини кўрсатиб ўтди.
Ўзбекистон ўзининг қишлоқ хўжалиги маҳсулотининг каттагина қисмини бошқа давлатларга Эрон орқали экспорт қилади.

МДҲ давлатлари темир йўл транспорти кенгаши МДҲда темир йўл транспорти орқали юк ва йўловчи ташишларни амалга ошириш борасида ҳамкорликни кенгайтириш мақсадида ташкил этилган.