Vimpelcom Ltd. телекоммуникация холдингининг собиқ бошлиғи Жо Лундер Осло аэропортида ҳибсга олинди. Бу ҳақида унинг адвокати Като Шётс хабар берган.
Юристнинг сўзларига мувофиқ Лундерга нисбатан айблов қўйилган. Шётснинг ўзи мазкур айблов билан ҳали танишганича йўқ. Адвокатнинг маълум қилишича, гап Vimpelcom Ltd.да содир бўлган коррупция ҳаракатида Лундернинг алоқадорлиги хусусида бормоқда.

Иқтисодий жиноятга қарши Норвегия бўлими вакиллари ҳибс ҳақида ҳеч нарса дейишмаяпти, аммо бу воқеани инкор ҳам этишмаяпти.

Жо Лундер 2011 йилда VimpelCom Ltd.да раҳбар бўлиб келган эди. У ўз лавозимини 2015 йилнинг апрель ойида тарк этди. Унинг ўрнига француз оператори SFR компаниясининг собиқ раҳбари Жан Ив Шарлье тайинланган эди.