Венада ўтган ҳафта бўлиб ўтган Сурия бўйича музокаралар Эрон ва Саудия Арабистони вакиллари ўртасидаги тортишув туфайли тўхтатиб қўйилиши мумкин эди. Бу ҳақда Bloomberg агентлиги хабар бермоқда.

Дипломатик манбалардан маълум бўлишича, Эрон ва Саудия Арабистони вакиллари бир-бирини кескин танқид қилган, жумладан, Эрон саудияликларни террорчиликда айблаган. Шу туфайли айримлар музокараларни узиб қўйиш фикрига кела бошлаган.

Эрон ва Саудия ташқи ишлар вазирлари Жавод Зариф ва Абдуллоҳ ал-Жубайр 11 сентябрь масаласида кескин баҳс олиб боришган, негаки ушбу терактни уюштиришда Зариф саудиялик фуқароларни айблаган. Бу айбловлар барча иштирокчилар, жумладан, АҚШ давлат котиби Жон Керрини ҳам ҳайратга солган.

Музокаралардан сўнг матбуот билан мулоқот қилган Эрон вакили бу терактларда Саудия Арабистони ҳукуматини эмас, айрим фуқароларинигина айблаганини таъкидлаб ўтган.