2015 йилнинг 16-22 ноябрь кунлари Тошкент шаҳрида “Эртанги кун бизники, марра бизни” шиори остида “Ёшлар ҳафталиги” бўлиб ўтади. Бу ҳақда “Ёшлар ижод саройи”да бўлиб ўтган матбуот анжуманида эълон қилинди.

“Ёшлар ҳафталиги” “Камолот” ёшлар ижтимоий ҳаракати, Олий ва ўрта махсус таълим вазирлиги, Маданият ва спорт ишлари вазирлиги, Ўзбекистон Бадиий академияси, “Ўзбеккино” Миллий агентлиги, Ўзбекистон Республикаси Президентининг “Истеъдод” жамғармаси томонидан ташкил этилади.

Бу йил илк бор ташкил этилаётган “Ёшлар ҳафталиги” доирасида: “PROlogue” (Муқаддима) – қисқа метражли фильмлар фестивали, мода ва дизайн ҳафталиги, талабалар театр студиялари фестивали, “Қувноқлар ва зукколар” кўрик-танловининг финал босқичи, “Тафаккур синовлари” танловининг якуний босқичи, “XXI аср – интеллектуал авлод асри” шиори остидаги илмий-амалий конференция, “Янги нигоҳ” видеороликлар танлови совриндорларини тақдирлаш маросими каби тадбирлар ташкил этилади.

Уларда олий ўқув юртларида фан, таълим, маданият ва санъат йўналишларида таҳсил олаётган иқтидорли талабалар, давлат мукофотлари ва номдор спидендиялар соҳиблари, ижтимоий фаол ёшлар, санъат ва маданият намоёндолари, таниқли илм-фан арбоблари, кино ва мода йўналишида ижод қилаётган хорижий экспертлар, оммавий ахборот воситалари ходимлари иштирок этадилар.

Мазкур ҳафталик “Камолот” ёшлар ижтимоий ҳаракати Васийлик Кенгашининг 2015 йил 31 мартдаги мажлисида тасдиқланган “Ўзбекистон Республикасида 2015 йилда ёшларга оид давлат сиёсатини амалга оширишга қаратилган қўшимча қора-тадбирлар дастури”га мувофиқ ўтказилмоқда.