Япониянинг бир гуруҳ фуқаролари мамлакат судига никоҳдан кейин эр-хотиндан бирортаси ўз фамилиясини ўзгартириши талаб қилинадиган амалдаги қонунчилик меъёрларини қайта кўриб чиқишни талаб қилиб мурожаат қилишди. NHK телеканалининг хабар беришича, Япония Олий суди 4 ноябрда ушбу шикоятни кўриб чиқишни бошлади.

Ушбу қонунга кўра, никоҳ қайд қилингандан кейин эр-хотин эр ёки хотиннинг фамилиясини ўзига танлаши керак. Даъвогарларнинг фикрича, бу қонун меъёри жинслар тенглиги тамойилини бузади. 

Шу даъво билан бир қаторда оила ҳуқуқига тегишли яна битта даъво аризаси кўриб чиқилади. Даъвода кўрсатилишича, амалдаги қонунда эр-хотин ажрашгандан кейин аёлнинг 6 ойгача қайта турмуш қуриши тақиқланиши конституцияга зиддир. Бу ҳужжат 100 йил аввал қабул қилинган ва ажрашишдан кейин туғилган боланинг отаси кимлигини аниқлашда хатоларга йўл қўймасликка имкон берган. Бу қонун меъёрига қарши чиқаётганларнинг таъкидлашича, бу меъёр конституцияга зиддир ва аёлнинг обрўсини камситади. Айниқса ҳозирги замонда ирсий таҳлилнинг ишончли усуллари ишлаб чиқилгани ҳисобга олинадиган бўлса, кўпчилик бу меъёрни эскилик сарқити деб ҳисобламоқда.

Ушбу даъволар бўйича якуний қарор жорий йил давомида чиқарилади. Агар суд даъвогарларнинг талабларини қондирадиган бўлса, япониялик қонун чиқарувчилар оила кодексининг эскириб қолган қоидаларини қайта кўриб чиқишлари керак бўлади.