2015 йил аввалида британиялик Дэйл Паркин ва унинг турмуш ўртоғи Мисрнинг Шарм-аш-Шайх аэропортида барча назорат ҳудудлари, жумладан, юклар текширувини айланиб ўтган ҳолда самолётга чиқиб олган эди. Бу ҳақда у Sky News телеканалига берган интервьюсида сўзлаб берди.

Паркиннинг сўзларига кўра, турмуш ўртоғи билан аэропортга келганидан сўнг терминалдаги узун навбатларга кўзи тушади. Бир оз вақтдан сўнг унинг олдига соқчилардан бири келиб, британияликка ноқулайликдан осонгина қутулиш йўли борлигини айтади. Улардан барча хавфсизлик жараёнларини четлаб ўтган ҳолда самолётга чиқиб олиши учун 20 фунт стерлинг (30 доллар) “хизмат ҳақи” сўрайди.

Сайёҳлар бунга рози бўлишади ва айтилган пулни тўлаб, юкларини конвейер тасмасига сканер текширувисиз қўйишади.
“Ўша пайтда 20 фунт эвазига навбатларни айланиб ўтиш мумкинлиги бизни ҳайратга солган эди. Содир бўлган янгиликни эшитгандан сўнг бу ишнинг мудҳиш оқибатини англаб етдим”, - тан олди Паркин 31 октябрь куни Синай яриморолида Россиянинг Airbus A321 йўловчи лайнери ҳалокатга учрагани билан боғлиқ ҳодисага изоҳ берар экан.

Эслатиб ўтамиз, 2015 йилнинг 31 октябрь куни Россиянинг "Когалимавиа" авиакомпаниясига тегишли Airbus-321 лайнери парвозга кўтарилгандан 23 дақиқа ўтиб ҳалокатга учраган эди. Мазкур самолёт бортидаги 217 нафар йўловчи ва етти нафар экипаж аъзосининг барчаси ҳалок бўлди.