Ҳиндистон ҳукумати портловчи қурилмани ўта тезликда топиб, махсус хизмат ходимларида улкан таассурот қолдирган етти ёшли полиция хизматидаги итни тақдирлашни режалаштиряпти. ОАВнинг маълум қилишича, гап лабрадор зотли, Рекс лақабли ит хусусида бормоқда. У Ҳиндистон-Тибет чегара полициясида хизмат қилади.

Рекс яқинда ўтган Ҳиндистон-Африка саммити хавфсизлигини таъминлашда қатнашган 20 ит сафида бўлди. Юқори лавозимли полиция амалдорининг маълум қилишича, машғулотлар пайтида Нарендра Моди ўтирадиган ўриндиқ остида 5 кг миқдорида гексоген моддаси яшириб қўйилган эди. Рекс уни икки дақиқадаёқ топди.

Амалдорнинг сўзларига кўра, кинологлар бўлими юқори даражада ўтадиган тадбирларнинг хавфсизлигини таъминлашда тез-тез қатнашиб туради.
Рексга айнан қандай мукофот берилиши ҳақида ойдинлик киритилмаган.