2015 йилнинг 11 октябрь кунги сайловларда ғолиб бўлган Александр Лукашенко бешинчи муддатга Беларусь президентлигига расман киришди, дея хабар бермоқда «Интерфакс-Запад».

Минскдаги Мустақиллик саройида бўлиб ўтган тантанали маросимда Александр Лукашенко мамлакат Конституциясига қўлини қўйган ҳолда беларусь тилида қасамёд қабул қилди.

“Беларусь Республикаси президентлиги лавозимига киришар эканман, Беларусь Республикаси халқига садоқат билан хизмат қилишга, инсон ва фуқаро ҳуқуқ ҳамда эркинлигини ҳурмат ва ҳимоя қилишга, Беларусь Республикаси Конституциясига риоя этиш ва ҳимоялашга, менга юклатилган олий масъулиятни қатъият ва виждон билан адо этишга тантанали равишда қасамёд қиламан”, - дейилади қасамёд матнида.

Лукашенко қасамёд қабул қилганидан сўнг ўз лавозимига киришиш тўғрисидаги актга имзо чекди. Марказий сайлов комияссияси раиси Лидия Ермошина унга президент гувоҳномасини топширди.

Аввалроқ Александр Лукашенко Беларусь президентлиги учун сайловларда 83,5 фоиз овоз тўплагани тўғрисида хабар қилинган эди.