Бугун, 6 ноябрь куни, машҳур ватандошимиз Шароф Рашидовнинг туғилганига 98 йил бўлди. Собиқ Иттифоқ даврида қарийб чорак аср мобайнида Ўзбекистонни бошқарган бу арбоб тарихда, марказнинг кучли назоратига қарамай, республикани ривожлантиришга муайян ҳисса қўшган раҳбар сифатида ном қолдирди.

Шароф Рашидов 1917 йилнинг 6 ноябрь куни Жиззахда туғилди. 1941 йили Тошкентдаги Ўзбек давлат университетининг филология факультетини тамомлади. 1935 йилдан бошлаб ўрта мактабда дарс бериб келди. 1941-1942 йилларда ҳарбий хизмат доирасида Иккинчи Жаҳон урушида иштирок этди. Турли газеталарда масъул лавозимларда ишлаб келди.
50-йиллардан унинг сиёсий фаолияти бошлади. 1959 йилдан бошлаб Ўзбекистон КП МК биринчи котиби бўлди. Кўплаб орден ва мукофотларга сазовор бўлди.

Шароф Рашидов айни пайтда таниқли ёзувчи ҳамдир. Унинг дастлабки шеърий тўплами “Самарқанд куйлари” номи остида чоп этилган. “Ғолиблар”, “Бўрондан кучли”, “Қудратли тўлқин” сингари романлар ҳамда бошқа кўплаб асарлар муаллифи.