"Реал" клуби ҳужумчиси Криштиану Роналдунинг агенти Жорже Мендеш ўз мижози фаолиятининг охиригача Мадридда қолишини яна бир бор таъкидлади ва унинг "МЮ"га қайтиши ҳақидаги хабарларни яна бир бор рад этди.

"Ҳозир бу борада жуда кўп гаплар бўлмоқда, ҳар куни янги хабар чиқади. Аммо мендан сўрайдиган бўлсангиз, Криштиану фаолиятини "Реал"да якунлайди, деб айтаман.

У бу ерда ҳали узоқ йиллар ўйнайди", - дейди Мендеш.

Бундан ташқари, у Роналдунинг "Спортинг"дан "МЮ"га ўтиш жараёни ҳақидаги хабарларга изоҳ берди.

"У "МЮ"га қарши ўйинда ўзини кўрсатгани учун эътиборга тушиб, трансфер қилингани ҳақидаги гаплар нотўғри. Унгача ҳам мижозимга кўплаб жамоалардан таклифлар бор эди. Сэр Фергюсон эса ёш футболчига асосий таркибдан жой ваъда қилиш эвазига Роналдуни қўлга киритган", деб қўшимча қилиб ўтган Мендеш.