Руминия пойтахти Бухарест марказидаги машҳур тунги клублардан бирида 31 октябрга ўтар кечаси содир бўлган ёнғин натижасида қурбон бўлганлар сони 38 кишини ташкил этмоқда. Бу ҳақда Mediafax хабар қилди.

Мамлакат Ички ишлари вазирлиги хабарига кўра, ёнғин вақтида куйиш жароҳати олганлардан 2 нафари даволаниш учун Нидерландияга юборилганди. Улардан бири йўлдаёқ вафот этган, иккинчиси Роттердамдаги шифохонада жон берган.

30 октябрда бинонинг ертўласида жойлашган тунги клубда бепул рок-концерт ўтаётган бўлган. Концертга 400 га яқин ёшлар йиғилган. Дастлабки маълумотларга кўра, пиротехник шоу вақтида шифтдаги пенопластдан ясалган безак элементлари ёниб кетган. Оқибатда кучли тутунланганлик бошланган, сўнгра портлаш юз берган. Гувоҳларнинг айтишича, кўпчилик саросимада ягона чиқишга отилганлар ва у ерда тиқилинч юз берган. Маълум қилинишича, кўпчилик нафас сиқишдан ҳалок бўлган. Руминия ОАВларининг маълумотларига кўра, ҳалок бўлганлар орасида хорижликлар ҳам бўлган.

Ҳодиса натижасида жароҳатланган 146 кишининг 86 нафари оғир аҳволда экани айтилган.