Халқ таълими вазирлиги томонидан 2015 йил 7 ноябрь куни Учтепа туманидаги 38-умумтаълим мактабида “Ораста қизлар” кўрик-танловининг якуний республика босқичи ўтказилди.

Кўрик-танловни ўтказишдан мақсад ўқувчи-қизларнинг ижтимоий ва интелектуал қобилиятларини ривожлантириш, уларда шахсий гигиеник қоидаларни тўғри шакллантириш, тиббий маданиятни ошириш, ўзининг ва атроф-муҳитнинг тозалигига эътиборни кучайтириш, жамиятда ижтимоий фаоллигини ошириш қолаверса, истеъдодли ёшларни қўллаб-қувватлаш ҳисобланади.

“Ораста қизлар” кўрик-танлови тўрт босқичда ташкил этилиб, унда умумтаълим мактабларининг 8-9-синф ўқувчи-қизлари иштирок этди.

Танловнинг якуний республика босқичида Қорақалпоғистон Республикаси, Тошкент шаҳри ва вилоятларидан ташриф буюрган ўқувчилар иштирок этди. Қатнашчилар 5та шарт бўйича беллашиб, ўзларининг бор иқтидорларини намоён қилишди.

Якуний натижага кўра, Фарғона вилояти Ўзбекистон туманидаги 17-умумтаълим мактабининг 9-синф ўқувчиси Рўзибоева Паризода 1-ўринни, Навоий вилояти Кармана туманидаги 15-умумтаълим мактабнинг 9-синф ўқувчиси Қурбонова Дилнавоз 2-ўринни ва Сурхондарё вилояти Термиз шаҳридаги 12-меҳрибонлик уйи тарбияланувчиси Абдумўминова Мафтуна 3-ўринни қўлга киритди.

Танловнинг ғолиб ва совриндорларига диплом ва эсдалик совғалари топширилди.