“Барселона” футбол жамоаси бош мураббийи Луис Энрике жамоанинг бош юлдузи, ҳужумчи Лионель Месси бўлмаганда ҳам яхши натижалар кўрсата олишга қодирлигини таъкидлаб ўтди.

“Матбуот тез-тез бизнинг Мессисиз ўйнай олмаслигимизни таъкидлайди. Албатта, Лионель ўйнаса бизга плюс бўлади, бироқ биз усиз ҳам ўйнай олишимизни намойиш қилганмиз.

Бизда аъло даражадаги жамоа бор ва ҳар бир ўйинчи ҳам ҳимояда, ҳам ҳужумда яхши ўйнай бошлади. Биз Мессисиз ўйнашга мослаша олдик. “Барса” нафақат Неймар ва Суаресдан иборат, биз ҳимоя ва яримҳимояда яхши ўйин кўрсатишимиз керак.

Албатта, мен барча ўйинчиларнинг таркибда бўлишини истардим, бироқ асосийси уларнинг соғлиғи. Мессининг тикланиши яхши кетмоқда. Ўйинчи учун “шифохона койкасида” ётишдан ёмонроғи йўқ”, деб айтди испаниялик мутахассис.

Эслатиб ўтамиз, Месси 26 сентябрда “Лас-Пальмас”га қарши учрашувнинг бошидаёқ тиззасидан жиддий жароҳат олиб, майдонни тарк этишга мажбур бўлган эди. Тахминларга кўра Мессининг тикланишига 2 ойча вақт талаб этилади.