Мисрда ҳалокатга учраган Россиянинг йўловчи самолёти борт ёзгичлари – “қора қутилари”даги барча маълумотлар муваффақиятли чиқариб олинди. Мутахассислар уларни ўқишни бошлашган, деб хабар берди авиафалокат сабабларини тергов қилиш бўйича тузилган Миср комиссияси раҳбари Иймон ал-Муқаддам. Бу ҳақда Reuters ахборот агентлиги хабар берди.

Ал-Муқаддамнинг айтишича, ёзувлардан шу нарсани билиш мумкинки, авиафалокатгача самолёт автопилотда учаётган бўлган. Самолёт кўрсаткичларини ёзиб олувчи қора қутидаги маълумотларни дастлабки ўқиш шуни кўрсатдики, самолёт ҳавога кўтарилгандан то қулашигача 23 дақиқа парвоз қилган. Фалокатгача самолёт керакли баландликка эришиб, соатига тахминан 521 км тезлик билан учган.

Ал-Муқаддамнинг таъкидлашича, иккинчи қора қути – учувчилар ўртасидаги ўзаро суҳбатни ёзиб олувчи қурилма ҳам ўқилиши бошланган ва уни тўлиқ ўқиб чиқиш учун муайян вақт талаб этилади.

“Ёзувда охирги сонияларда қандайдир шовқин борлиги аниқланган”, деб айтди Ал-Муқаддам. Унинг айтишича, бу шовқиннинг келиб чиқиши табиати махсус лабораторияда спектрал таҳлил орқали ўрнатилади.

Ал-Муқаддамнинг таъкидлашича, олинган маълумотларни таҳлил қилиш керак бўлади ва фалокатнинг қайсидир бир версиясида тўхташга ҳали эрта.