Қозоғистон тиббиёт туризми ассоциациясининг ташаббуси билан МДҲ давлатлари орасида биринчи ва ҳозирча ягона бўлган тиббий самолёти — LearGet-45 ишга туширилади. Унинг борти тамомила тиббий ускуналар билан жиҳозланган бўлиб, учиш вақтида ҳам жарроҳлик амалиётларини ўтказса бўлади. У халқаро миқёсда парвозлар уюштиради. Бу ҳақда BNews.kz хабар бермоқда.

Қозоғистон Республикаси парламентидаги ижтимоий-маданий тараққиёт қўмитаси аъзоси Надежда Петухованинг маълум қилишича, янги самолётнинг бортида бир вақтнинг ўзида икки беморга ёрдам кўрсатилиши мумкин. Бундан ташқари, асосий ва ёрдамчи ходимлар учун ҳам жой ажратилган.

Самолёт бортида фаолият олиб борувчи тиббиёт ходимлари ичида юқори малакали травматолог, анестезиолог, акушер-гинеколог, педиатр каби соҳа вакилларини учратиш мумкин бўлади. Туғуруқ жараёнини намунали ўтказиш учун самолёт борти зарур қурилмалар билан жиҳозланган. Самолёт ичидаги ҳаво босими махсус датчиклар ёрдамида назорат қилиб борилади. Шу боис унда олиб кетилаётган беморга бу борада муаммо туғилмайди.

ASPAN авиакомпанияси бош директорининг айтишича, LearGet-45 самолётини яқин кунларда фойдаланишга туширилиши режалаштирилган.