Ўзбекистоннинг ялпи ташқи қарзи ялпи ички маҳсулотининг 16 фоизини ташкил қилмоқда. Ундан 8 фоизи давлат қарзи ва 8 фоизи хусусий сектор қарзидир. Бу ҳақда Тошкентда бўлиб ўтаётган Халқаро инвестицион анжуман иштирокчиларига Ўзбекистон ҳукумати номидан нутқ сўзлаган молия вазири Рустам Азимов айтди.

Ўзбекистон ташқи қарзлар сиёсатида учта тамойилга таянади:
Биринчиси: Ўзбекистон истеъмолчилик мақсадлари учун кредит олмайди, яъни “еб-ичишга”.
Иккинчиси: Ўзбекистон агар қарзни тўлиқ ҳажмда қайтара олмаса, унда кредит олмайди.
Учинчиси: Ўзбекистон ташқи қарзни инвестицион мақсадлар учунгина, яъни иқтисодиётнинг реал секторидаги муҳим лойиҳаларни амалга оширишга ҳамда базавий саноат, коммунал ва ижтимоий инфратузилма, жумладан таълим ва соғлиқни сақлаш тизимини ривожлантириш учун олади.

Ташқи қарзларнинг 85 фоиздан кўпроғи устувор инвестицион лойиҳаларни амалга ошириш учун 15 йилдан кўпроқ муддатга, 10 йилгача имтиёзли даврга йилига 0,1 фоиздан 0,5 фоизгача фоиз ставкаси билан тақдим қилинган.

Энг асосийси, Ўзбекистонга жалб қилинган барча кредитлар, таълим ва соғлиқни сақлаш тизими учун олинган кредитлардан ташқари, олинган қарзларни қоплаш учун ўзи фойда келтиради, деб айтди Рустам Азимов.

Таҳлилчиларнинг таъкидлашича, 2001 йилдан 2015 йилгача бўлган даврда Ўзбекистоннинг ташқи қарзи мамлакат ЯИМига нисбатан 4 марта камайган. Эътиборлиси, охирги ўн йилдан бери ЯИМда хусусий сектор улуши ортиб бормоқда.