9 ноябрь куни Австралиянинг бир қатор халқаро аэропортларида чегара хизмати ходимларининг иш ташлаши натижасида йўловчилар ва юкларнинг рўйхатдан ўтиш пунктлари ҳамда чегара ва божхона назорати пунктларида тиқилинч вужудга келди. Бу ҳолат мамлакатнинг саккиз халқаро аэропорти - Сидней, Мельбурн, Кэрнс, Аделаида, Брисбен, Перт, Дарвин ва Голд-Костада 24 соат вақт давомида кузатиляпти.

Бу сўнгги уч ой давомида кузатилаётган учинчи худди шундай ҳолатдир. Бундан олдин август ойи ва сентябрь охирларида мамлакат аэропортларида чегара хизмати ходимларинининг иш ташлаши кузатилганди. Натижада аэропортларда бир неча соатга иш тўхтаб қолганди. Аммо бу ҳеч қандай самара бермаган эди. Уларнинг талаблари қўшимча иш соатлари ва иш кунлари учун ҳақ тўлинишига ҳукумат эътиборини қаратишдир.

"Бизнинг қарама-қаршилик бир йилдан бери давом этяпти. Энди ҳукумат вакилларининг бир стол олдида ўтириб, мавжуд муаммоларни ҳал этиш вақти келди”, - деди мамлакат касаба уюшмалари котиби Надин Флад.