Британия молия канцлери Жорж Осборн мамлакатда махсус хизматлар ходимлари сонининг сезиларли даражада оширилишини маълум қилди, дея хабар бермоқда Reuters агентлиги.

“Тасдиқлашим мумкинки, келгуси беш йилликда биз террористик суиқасдларни таъқиб, таҳлил ва бартараф қилувчи барча разведка хизматлари ходимлари сонини жиддий равишда оширамиз”, - деди Осборн. Унинг қўшимча қилишича, барча батафсил маълумотлар 23 ноябрь куни Британия бош вазири Дэвид Кэмерон томонидан маълум қилинади.
Яқинда ҳукуматга махсус хизматларга янги имкониятлар, жумладан, интернет-фойдаланувчилари ташриф буюрадиган веб-саҳифаларни кузатиш ҳуқуқини тақдим этадиган қонун лойиҳаси тақдим этилган эди.

“Уруш, жосуслик ва терроризмнинг хусусиятлари ўзгармоқда, биз ҳам улар қатори ўзгаришимиз лозим. Замонавий ҳаётнинг ажралмас қисмига айланган интернет душманларга ҳар доим бизга қарши янги ҳаракат чораларини тақдим этади. Шу боис биз террористлар ва эсктремистик ғоялардан юзага келаётган таҳдидларга қарши юзма-юз чиқишимиз шарт”, - деди Осборн.

Канцлер сўзларига кўра, Синайда Россия йўловчи самолёти билан содир бўлган фожиа шу каби чораларни зудлик билан қабул қилиш ҳақида оғриқли тарзда огоҳлантиради.