Эрон мудофаа вазири Ҳусайн Деҳқон ўзининг АҚШлик ҳамкасби Эштон Картернинг Эроннинг Яқин Шарқдаги ихтилофларда фаол иштирок этаётгани ҳақидаги айбловларига жавобан унга “тилига эрк бермасликни” маслаҳат берди, деб хабар бермоқда Press TV нашри.

“АҚШ мудофаа вазири Эрон ҳукуматига нисбатан ўз муносабатини, ўзининг тажовузкор, безориларча хатти-ҳаракатларини ўзгартириши ва бундан буёғига ўз фикрини фаросатлироқ ва эътиборлироқ билдириши лозим”, деб айтди Деҳқон.

Аввалроқ Картер The Atlantic журналига берган интервьюсида Эроннинг Яқин Шарқдаги ҳаракатларига баҳо бериб, Теҳроннинг минтақадаги бошқа давлатларга таъсирига изоҳ бериб ўтди.

Деҳқоннинг айтишича, Картер Яқин Шарқ давлатларига иғво қилишни тўхтатишдан кўра АҚШнинг Сомали, Афғонистон, Ироқ ва Яман билан юзага келган таранг муносабатларини Эрон билан ҳам сақлаб қолади.

Эрон мудофаа вазирининг айтишича, АҚШ Яқин Шарқдаги вазиятни тобора ёмонлаштираётган сиёсат олиб бормоқда.