АҚШнинг General Electric ва Франциянинг Alstom компаниялари Ҳиндистонда локомотивлар ишлаб чиқарувчи корхонаси қуриш бўйича тендерни ютиб чиқишди. Бу ҳақда Ҳиндистонда чоп этиладиган Financial Express газетаси сайтида маълум қилинди.   

400 млрд рупийлик (6,5 млрд доллар) шартномаларга кўра Ҳиндистоннинг шарқида жойлашган Бихар штатида яратиладиган иккита корхонада мингта General Electric тепловози ва 800 та Alstom электровози қурилиши керак.

Тендер шартларига кўра, General Electric 100 та тепловозни тайёр ҳолатда етказиб бериши керак, сўнгра 900 тасини 10 йил давомида ясаши лозим. Ўз навбатида, Alstom 5 та электровозни тайёр ҳолатда етказиб беради, қолган 795 тасини 11 йил ичида қуриб беради.

Ушбу лойиҳадаги 74 фоиз улуш General Electric ва Alstom компанияларига, қолган 26 фоизлик улуш эса  Ҳиндистон темир йўлларига тегишли бўлади.