Американинг Google корпорациясининг Google Life Sciences шўъба компанияси инсонлардаги юрак қон-томир хасталикларига қарши курашнинг янги ва инновацион усулларини ўрганиш бўйича илмий-тадқиқот лойиҳасида иштирок этади. Бу ҳақда 8 ноябрь куни Орландо шаҳри (Флорида штати)да бўлиб ўтган Америка кардиологлар ассоциацияси (АКА) конференциясида маълум қилинди.

Хабарларга кўра, лойиҳанинг умумий қиймати 50 миллион долларни ташкил этади. Бунда Google ташкилотга 25 миллион доллар сармоя киритса, қолган ярим маблағ билан АКА молиялаштирилади.
Google Life Sciences раҳбари Энди Конраднинг конференцияда маълум қилишича, сайёрамизда юрак хасталикларидан бошқа сабабларга қараганда кўпроқ инсонлар вафот этмоқда.

“Ушбу муаммо уни инновациялар ёрдамида ҳал этишга киришишни тақозо қилмоқда”, - қайд этди Конрад. Унинг қўшимча қилишича, ҳозирга қадар юрак касалликларига қарши кураш усулларини ўрганиш соҳасида ўсиш жуда секин кечаётган эди.
Конрад сўзларига кўра, лойиҳа эрта босқичда бўлгани сабабли аниқ тафсилотларни айтишга ҳали вақт бор. 2016 йил аввалида Google ва АКА ҳамкорликдаги муассаса раҳбари ким бўлишини маълум қилишади.

Google Life Sciences компаниясига 2015 йилнинг августида корпорациянинг биотиббиёт бўлинмаси базасида асос солинган. Компания турли касалликлардан азият чекаётган инсонларнинг муаммоларини ҳал этишга йўналтирилган тиббий-техник тадқиқотлар ва ишланмалар устида изланишлар олиб боради. Жумладан, у қандли диабетга чалинган инсонлар учун улар кўз ёшларидаги глюкоза даражасини мунтазам равишда ўлчаш учун махсус датчик билан таъминланган махсус контакт линзаларини ишлаб чиқишга масъул ҳисобланади.